About us

دائرہ شاہ علم اللہؒ (تکیہ کلاں رائے بریلی) کی بستی بڑی مردم خیز بستی رہی ہے، یہاں مختلف زمانوں میں بڑے بڑے علماء مشائخ اور مصلحین و مجددین پیدا ہوئے، اسی سرزمین سے حضرت سید احمد شہیدؒ نے تحریک اصلاح و جہاد بلند کی، جس کے نتیجہ میں بقول حضرت مولانا حسین احمد مدنیؒ ہندوستان میں مسلمان اپنے دین و شریعت کے ساتھ باقی رہے۔ اس اخیر دور میں اسی بستی میں امام العصر حضرت مولانا سید ابوالحسن علی ندویؒ جیسی شخصیت پیدا ہوئی، جن کے اصلاحی و تجدیدی کارناموں کا دائرہ بڑا وسیع اور ہمہ گیر ہے۔

تقریباً بیس پچیس سال قبل کچھ دردمندوں نے حضرت سید احمد شہیدؒ کے نام پر اسی بستی میں ایک ’’اکیڈمی‘‘ قائم کی تھی، مگر عرصہ تک افراد مہیا نہ ہونے کی وجہ سے کام آگے نہ بڑھ سکا، پھر ۱۴۱۳ھ میں اس کی تجدید کی گئی اور دار عرفات نے اس مبارک کام کو اپنے ذمہ لیا اور اسی سال افتتاح کے طور پر دو اہم کتابچے شائع کیے گئے، حضرت مولانا سید ابوالحسن علی ندویؒ نے اس کی سرپرستی قبول فرمائی اور باقاعدہ کام کا آغاز ہوا، حضرت مولانا کی وفات کے بعد حضرت مولانا محمد رابع حسنی ندوی مد ظلہ اس کے سرپرست متعین ہوئے اوراکیڈمی نے اپنی تصنیفی وتحقیقی سرگرمیاں جاری رکھیں، اﷲ کے فضل سے مختصر سے عرصہ میں اس نے مختلف موضوعات پر سو سے زائد کتابیں شائع کیں، یہ کتابیں اہل علم حلقہ میں مقبول ہوئیں اور اصحاب علم ودانش نے استفادہ کیا۔